Te Ranga

Te Ranga

Te Mahi a Te Ranga

Ko te mahi a te Ranga he whakarongo, he whakangāwari, he āta tuhi hoki i ngā whakaaro o ngā tāngata o Aotearoa mō ngā take kaupapa ture; nō te mutunga o te tau 2013 ka whakahokia e ia tana pūrongo ki te kāwanatanga.

Ko te haepapa ia o te Ranga:

  • He whakamōhio i te iwi tūmatanui ki ngā whakaritenga kaupapa ture o nāianei, me te whakarite kia noho mai he mōhiotanga tōkeke, mārama hoki i mua i a rātou.
  • He rapu i ngā whakaaro o te tini noa iho o te tangata.
  • He whakahoki kōrero ki te kāwanatanga me ngā whakamaherehere me ētahi atu take i whakaaetia whānuitia e tika ana kia kawea tonutia.

Te Rautaki Whakawhanaunga

I whakaritea e te Ranga kia haere ā-taumata ngā mahi, kia rongo rātou i ngā kōrero a te tini noa o te hunga o Aotearoa:

  • Taumata 1 Whakaoho i te tangata: He arotahi ki ngā taputapu me ngā hononga e tika ana kia pai ai te whakawhanaunga.
  • Taumata 2 Whakamārama: Ka huri ki te kimi māramatanga mō ā tātou whakaritenga kaupapa ture o nāianei me te hanga māramatanga mō te whakawhiti kōrero mō te kaupapa ture.
  • Taumata 3 Wānanga: Ka whakapiri atu ki te huhuatanga o ngā whatunga me ngā hapori, me te akiaki i aua kupenga kia whāngai whakaaro mai ki a mātou, mā te pae tukutuku me ngā hui, kanohi ki te kanohi.
  • Taumata4 Wānanga: Ka uru ki ngā whakawhitinga kōrero ētahi wānanga, ko ōna mema ka kōwhiria i te huhuatanga o ngā rōpū. Mā ēnei wānanga e whiriwhiri ngā whakaro o ngā tāngata o Aotearoa i kohia ai i te taumata tuatoru.
  • Taumata 5 Te Whakapūrongo: I whakahokia e mātou tā mātou pūrongo whakamutunga ki ngā Minita whai haepapa i te mutunga o te tau 2013.

Ko te aronga nui o te taumata tuatahi ko ngā kōrerorero tuatahi ki ngā whatunga ā-hapori, ā-whare wānanga, ki ngā iwi me ngā hapū. Ko te aronga ia o ngā taumata tuarua, tuatoru hoki, he whakarite huarahi e whai wāhi ai ngā tāngata katoa o Aotearoa ki te whakawhitinga kōrero kaupapa ture o Aotearoa, mā te huhua o ngā āhuatanga pāpāho.

Ka taea e koe te tiki ake i te Rautaki Whakawhanaunga katoa ki te hōputu Adobe Acrobat (.PDF), ki te hōputu Microsoft Word (.DOCX) rānei.

Te Whakawhitinga Kōrero roa kē atu

Ko te whakahau matua ia o te Ranga kia tautoko tonu te Kāwanatanga i te whakawhitinga kōrero mō te kaupapa ture, mā te whakawātea i ngā rauemi katoa e tika ana kia noho mōhio te iwi mō ngā whakaritenga o nāianei me ngā kōwhiringa mō ngā rā e tū mai nei.

Ngā Haurongo Poto o Te Ranga

Ahorangi Hōnore John Burrows QC (Hemana paheko)

Kātahi tonu nei ka mutu te noho o Ahorangi Hōnore Burrows hei kaikōmihana mō te ture. I ārahi, i ārahi ngātahi rānei, ia i ētahi arotakenga Kōmihana Ture, tae atu ki te Whakaaturanga o ngā Ture ā-Pukapuka o Aotearoa, te Tūmataitinga, te Ture Pārongo Whaimana 1982, me ngā Taraipiunara o Aotearoa. He whānui tonu ōna mōhiotanga ā-ture, ā, koia hoki te kaituhi i te tuhinga matua e mōhiotia nei ko Statute in New Zealand.

He kaiwhakaako i te ture mō ngā tau maha, ā, he kaiwhakapuaki whakaaro a Ahorangi Burrows mō te pūnaha ture o Aotearoa e mōhio nuitia ana. He ngahau ki a ia te kauwhau mō ngā kaupapa ture ki te hunga rōia, me te hunga tūmatanui hoki.

Ta Tipene O’Regan (Hemana pakeho) (Ngāi Tahu)

Ko te take pea i tino mōhiotia ai a Tā Tīpene e te motu, ko āna mahi hautū i ngā whakawhitinga kōrero i raro i te Tiriti mō ngā whakataunga nui rawa e rua (ngā tauranga ika a te iwi Māori me te kerēme a Ngāi Tahu), otirā, he tini anō āna mahi i te ao ārahi whakahaere, me te ao kaipakihi. He tumuaki tuarua ia nō Transit NZ, he kaihautū nō TVNZ, koia te hemana o Sealord, ā, he mema ia, i roto i ngā tau, nō ngā poari i Ingarangi, i Nōwei me Ahitereiria.

E rua ana tohu kairangi hōnore, mō te mahi tauhokohoko tētahi, mō ngā tuhinga tētahi. Ko Tīpene te Amokapua Mātāmuri o Te Whare Wānanga o Waitaha i mua, ā, i ēnei rā koia te hemana o te Pūtahi Rangahau Kaupapa Iwi Taketake o Aotearoa. He tangata e whāia nuitia ana hei kaikōrero, i runga i tōna hiakai i te mātauranga, me tōna kaha i roto i te whanaketanga rautaki.

Neke atu i te 40 tau a Tā Tīpene i roto i ngā mahi ārahi, nā tēnei, nā ana tirohanga matawhānui hoki, i rawe ai tāna noho i te tūru hemana paheko.

Ko Peter Chin

Ko Peter Chin tētahi uri nō Haina, ko ana mātua nō Haina, ā, i whānau mai ia i Aotearoa, ko tana kāinga mai i tōna whānautanga, ko Ōtepoti. I mahi a Peter hei mema nō te kaunihera o te tāone mō te 15 tau, e ono ana tau koia te Koromatua. I mahi a Peter hei rōia mō te 45 tau, neke atu, ā, he tini ana mahi i te hapori, i te ao toi whakaari; te mātaranga, ngā mahi toko i te ora, Rotary me te hapori o te iwi Hainamana. He hemana a Peter nō te Kōmihana Petipeti i mua, ā, i ēnei rā he kaitiaki ia nō te Asia New Zealand Foundation me te Chinese Poll Tax Heritage Trust.

Nā ana mahi i ngā take hītori nunui o Aotearoa me tana mahi i te taha o te hapori hainamana, i noho mārama ai a Peter ki ngā take o ngā ahurea maha o Aotearoa. Hei āwhina ēnei mahi āna i tana noho hei mema mō te Ranga.

Ko Deborah Coddington

Kua roa a Deborah Coddington e mahi ana hei kaikawe kōrero, tae atu ki te tuhi kaupapa roa mō ngā mōheni o North & South me Metro. Kei Wairarapa ia e noho ana. Ko ngā take mātauranga me te tūkino tamariki ētahi o ngā kaupapa e rangahaua ana e ia, tae atu ki te ao arumoni me ngā mahi kaipakihi. He torowhānui te titiro a Deborah hei kaikawe i te rongo, ā, he whānui tonu tōnu mōhio ki ngā tāngata o Aotearoa. He tautōhito ia i te ao tōrangapū, nā tana noho hei Mema Pāremata ā-rarangi, i ako ai ia i ngā nekeneke o te kāwanatanga, me te noho hei māngai mō te tangata takitahi.

I kaha ai a Deborah ki te whakawhanaunga ki te hunga ka tūtakina ia rā i Aotearoa, nā tana mōhio ki te kōrero ki te kaipānui ki ngā kupu poto, ki te reo mārama.

Hōnore Tā Michael Cullen

I tēnei wā ko Tā Michael te hemana o Zealand Post, ā, koia hoki te takawaenga matua mō ngā Kerēme Tiriti o Ngāti Tūwharetoa. E tino mōhio pū ana a Tā Michael ki ngā pēheatanga o te mahi kāwanatanga, inā hoki he mema Pāremata ia mō te wā roa, he Pirīmia Tuarua, he Rōia Matua o Te Kāwanatanga, he Minita Whakahaere i ngā Whakawhitinga Tiriti o Waitangi, He Minita mō ngā Pūtea, he Kaiārahi hoki i te Whare.

Nā ana mahi tini hei kaitōrangapū ka haria mai e ia he mōhiotanga tūturu mō ngā take tōrangapū i mua i te Ranga.

Hōnore Tā John Luxton

He Minita, he Mema Pāremata ā-Rohe i mua a John, ā, i tēnei wā he kaiahuwhenua, he kaihautū kamupene, he kaitohutohu hoki ia. He mātauranga tōna i te ao kāwanatanga, i te mahi ārahi, i te whanaungatanga o te Karauna o te Māori, i ngā hononga hoki ki te hapori. He wheako ō John i te whakahaere ngātahi hei hemana paheko o te Mana Whakahaere o Te Awa o Waikato hei kanohi mō te mahi ahuwhenua, hei hemana mō DairyNZ, me ētahi atu kaupapa i tua atu i ngā kaupapa Māori.

He nui ana mahi hanga tikanga, ā-kikokiko i te ao kaipakihi, kāwanatanga hoki. Ki a John, me rapu e te motu o Aotearoa he matakitenga mō te katoa, me te noho o ngā mātāpono manapori ki te pūtahi o taua matakitenga.

Ko Bernice Mene

He kaiako kura tuarua whai tiwhikete a Bernice Mene, ā, koia hoki te kanohi mō Aotearoa i tētahi wānanga mātauranga, nā te OECD, hei kaitiaki mō te kaupapa Secondary Futures Education. Ko ētahi atu o ana mahi he tohutohu i ngā ākonga tuatoru me ngā kaitākaro mātāmua, tae atu ki ngā mahi whakahaere mō ngā rōpū tākaro. Kua whiwhi a Bernice i te tohu MNZM mō ana mahi mō te poitarawhiti/netipōro, mō tana tākaro mō te Silver Ferns mō te tekau tau, mō tana mahi i roto i ngā mahi pāpāho, i te kauwhau tūmatanui, i ngā mahi kōrero i te pouaka whakaata, tae atu ki ana mahi ārahi mō ngā rōpū hapori.

Ko ētahi o ngā tino mahi kaingākau a Bernice ko ana mahi me te rangatahi, ki te mātauranga me te hauora, otirā nā tana kanohi rongonui kua tūhono ia ki ngā hapori maha.

Tākuta Leonie Pihama (Te Ātiawa, Ngā Māhanga a Tairi, Ngāti Māhanga)

Tokoono ngā tamariki a Tākuta Leonie Pīhama, tokorua ana mokopuna. He Ahorangi Mātāmuri a Leonie i Te Whare Wānanga o Waikato, koia hoki te Kaihautū o te Kotahi Research Institute. I mahi ia hei Kaikauwhāu Mātāmua i Te Whare Wānanga i mua, e whakaako ana i ngā mahi tātari kaupapa, i ngā take wāhine me ngā tōrangapū o te whakaahua i ngā iwi taketake o te ao. I mahi a Leonie i te poari whakatū i Whakaata Māori, ā, i mahi hoki ia i tērā ao, i te ao whitiāhua, i te ao hanga pānui pāpāho. I oti i a Leonie tētahi karahipi Fullbright i Te Whare Wānanga o Washington.

Nā ngā mōhiotanga o Leonie kua tūhono ia ki te whānuitanga o ngā hapori me ngā iwi, i āhei ai ia ki te whakawhanaunga atu ki ngā momo tāngata maha i Aotearoa.

Ko Hinurewa Poutu (Ngāti Rangi, Te Āti Haunui a Pāpārangi, Ngāti Maniapoto)

He ākonga tohu kairangi a Hinurewa Poutu i Te Kunenga ki Pūrehuroa, he pouako hoki ia i Te Kura Kaupapa Māori o Mana Tamariki. He tauira ia i puta i te Kura Kaupapa Māori, ā, ko ana mahi whare wānanga i aronui ki te rangahau, me te whakaako i te reo Māori. I ako ia i nga akoranga pāpāho i a ia e mahi ana hei kaiwhakaatu, hei kaitohutohu reo Māori ki ētahi kaupapa pouaka whakaata. I aro ngā pānui nei ki te tamariki, ki te taiohi, ki te tākaro me te matahuhuatanga o ngā ahurea.

Koia te mema taiohi rawa o ngā mema o te Ranga, me kī, nā te noho mai a Hinurewa i noho mata tonu ai ngā mahi me ngā whakaaro o te Ranga, i aronui ai hoki ki te kākano-ruatanga.

Ko Ahorangi Linda Tuhiwai Smith (Ngāti Awa, Ngāti Porou)

Ko Linda Tuhiwai Smith te Ahorangi mō te Mātauranga me te Whanaketanga Māori, koia hoki te Amokapua Mātāmuri i te Whare Wānanga o Waikato. E hāngai ana ana mahi whakaako ki te mātauranga me te hauora, tae atu ki ngā kaupapa hauora Māori. He whānui tonu ngā tuhinga a Linda kua puta i roto i ngā pukapuka me ngā hautaka maha, tae atu ki te pukapuka Decolonising Methodologies Research and Indigenous Peoples.

He kaihautū paheko ia mō Ngā Pae o Te Maramatanga i mua, ā, he Ahorangi hoki mō te Mātauranga i te Whare Wānanga o Tāmaki-makau-rau.

Nā te kaha o Ahorangi Smith me tana whakapono ki ngā pūmanawa o te rangatahi, nā ōna tautōhito i ngā mahi takawaenga, i kaha ai te whakawhanaunga ki ngā hapori, i tino whai wāhi mai ai ki roto i te kaupapa.

Ko Peter Tennent (Te Aupōuri)

He Koromatua a Peter Tennent nō te tāone o Niu Pāremata i mua, ā, he kaha ia ki te akiaki i te hapori me te iwi tūmatanui kia whai wāhi ki ngā mahi o te wā. I whakaingoatia ia hei Koromatua mō te Ao i te tau 2010, i te taha o ētahi atu, ā, ka whakaingoatia koia tētahi o te kapa o ngā kaihautū tekau o runga rawa o te ao. He poutokomanawa a Peter i roto i ngā mahi whakaora i Niu Pāremata – ā-ōhanga, ā-pāpori, ā-ahurea hoki - ko tāna mahi he takawaenga ki ngā rōpū maha kia kimi huarahi hou, ahakoa ngā take tawhito maha. I ākona ia hei kaikaute i Te Kunenga ki Pūrehuroa, ā, i pau te tini o ngā tau he kaitiaki pāparakāuta, i ngā tūnga tūmatanui anō hoki.

Nā te kaha o Pita ki te hautū, ki te whakapiki i te kaha o te tangata kia anga whakamua o Aotearoa, i manahau ai ngā mahi a te Ranga.

Ko Tākuta Ranginui Walker (Te Whakatōhea)

He mema a Ranginui Walker nō te Kaunihera Māori o Aotearoa, me te Kaunihera o ngā Iwi Taketake o te Ao. E ono āna pukapuka i tuhi ai, tae atu ki te pukapuka i hokona nuitia nei, Ka Whawhai Tonu Mātou: Struggle Without End. Ko Ranginui te Ahorangi mō ngā Akoranga Māori i te Whāre Wānanga o Tāmaki-makau-rau, ā, ka tukua e ia tana tūranga hei Amokapua Mātāmuri i te tau 1997.

He whānui tonu āna mahi hei kaitātari i ngā whakahaere tuatoru mō te Wāhanga Tātari Akoranga o ngā Whare Wānanga o Aotearoa, me te Mana Tohu Mātauranga, ā, i tēnei wā he mema ia nō te Rōpū Whakamana i te Tiriti o Waitangi.

I whakawhiwhia a Ranginui ki te tohu DCNZM i te tau 2000, ā, ka whakawhiwhia ki te Merara a Te Pirimia mō ngā tuhinga kōrero pono i te tau 2009.

Ko tā Ranginui takoha ki te Ranga ko ōna wheako maha i te mahi tahi ki ngā tāngata katoa i ngā taumata katoa o te ao, tae atu ki tana mōhiotanga hōhonu mō ngā kōrero tuku iho o Aotearoa me te iwi Māori.