Te Whakawhiti Kōrero

Te Whakawhiti Kōrero

I haere te Whakawhitinga Kōrero mō te Kaupapa Ture mai i te marama o Hui-tanguru/Pepuere ki te marama o Hōngongoi/Hūrae 2013. I roto i ngā marama o te Whakawhitinga Kōrero, i tae ake ngā mema o te Ranga Kaupapa Ture ki ngā hui ā-hapori, me ngā rā motuhake, pēnei i ngā hui whare wānanga 120, neke atu.

I tū ngā hui nei i ngā tōpito katoa o te motu, mai i Kaitāia ki Motupōhue i Te Waihōpai, mai i te Tūranga-nui-a-Kiwa ki Taranaki, mai i Ōtautahi ki Māwhera. He mea āta tautoko ia rōpū tangata whenua kia waihangatia tētahi hui huatau mō tō rātou hapori. Tā te Ranga he tāpae pūtea mō te wāhi hui, mō ngā kai, mō tētahi kaitātaki, me te whakarite i tētahi rōpū whakahaere mō te rā, me i tonoa mai.

I whakawhanaketia he rauemi mōhiotanga hei āwhina i ngā tāngata takitahi, me ngā rōpū hei hanga tāpaetanga, hei tautoko i ngā hapori kia noho hei tangata whenua mō ā rātou whakawhiti kōrero.

I hangaia he aratohu tāpaetanga hei whakarite mōhiotanga poto mā te hunga whai wāhi mai mō ngā kaupapa e whiriwhiritia ana, me ētahi pātai arataki hei āwhina i te tuhinga i te tāpaetanga. I ākina hoki te hunga whai wāhi mai kia tuku whakaaro mai mō tētahi atu kōwae o ngā kaupapa, ahakoa he aha, me te whakaara i ētahi atu kaupapa, me i hiahia rātou kia pērā. I inoitia te hunga tuku tāpaetanga kia hora pūtake mō ō rātou whakaaro. I whakawāteatia te aratohu tāpaetanga ki te reo Rotarota, ki te reo Tonga, ki te reo o Rarotonga, ki te reo Māori, ki te reo Hāmoa, te reo Hainamana, te reo Kōriana me te reo Inia.

I hāngai anō te whakawātea mai i ngā rauemi mōhiotanga mai i te pae tukutuku o te Ranga, ā, i tonoa hoki he kape mārō mai i tētahi nama utu-kore. I te pae tukutuku hoki he kuputaka, he rārangi pukapuka, me ētahi hononga ki ngā paetukutuku o waho he mōhiotanga atu anō kei reira, mā te hunga e hiahia ana ki te ruku hōhonu ki roto i ngā pūtake kaupapa ture.

I roto i tētahi kōkiri pāpāho i te marama o Aperira/Paenga-whāwhā, ka piki te māramatanga o te iwi nui ki ngā whāinga wāhi ki te kōrero, waihoki i ētahi putanga pāpāho. I haere anō hoki tētahi atu kōkiri ā-tānga, ā-ipurangi i te marama o Hūrae/Hōngongoi i te mutunga o taua marama. Neke atu i te 6,400 ngā pīrangitanga i Facebook, ā, 116,000 ngā tirohanga tāngata motuhake ki te pae tukutuku.

I tae mai ētahi tāpaetanga 5,259 ki te Ranga mai i ngā tāngata takitahi me ngā rōpū, me te tini anō o ngā tirohanga o roto. Ka mārama ki te titiro atu, i te kōrerorero ngā tāngata takitahi me ngā rōpū i ō rātou whakaaaro ki ō rātou whānau, ō rātou hoa, otirā ki te iwi me te hapori. Ka whakaahuatia i te tini o ngā tāpetanga ā-tangata takitahi, ā-rōpū hoki he tirohanga e whanake haere tonu ana, i ngā tāngata e tahuri nei ki te ako i ngā āhuatanga o ēnei momo kaupapa, me tā rātou whaiwhai hoki i ngā whakawhitinga kōrero mō ā tātou whakaritenga kaupapa ture.