Pātai Auau

Pātai Auau

P. He aha te mahi me te pūtake i whakatūria ai te Ranga Kaupapa Ture?

He rōpū tohutohu motuhake te Ranga Kaupapa Ture i whakatūria e te Pirīmia Tuarua me te Minita mō ngā Take Māori hei whakarongo, hei āta whiriwhiri, hei whakahoki mai i ngā whakaaro o ngā tāngata mō te whānuitanga o ngā take o te kaupapa ture.

Hei whakaata ngā tohutohu a te Ranga i te Whakawhitinga Kōrero nui tonu, tae atu ki ngā tāpaetanga i āta tuhia, te hui ā-kanohi, me ngā tāpaetanga mā te whārangi Facebook o te Ranga.

Inā ngā whakaritenga mahi a te Ranga kei: [.PDF]

P. Ko wai mā ngā mema o te Ranga?

Ko ngā Mema 12 o te Ranga: Ko Ahorangi Hōnore John Burrows (Heamana Paheko) rātou ko Tā Tipene O’Regan (Heamana Paheko), ko Peter Chin, ko Deborah Coddington, ko Tā Michael Cullen, ko Hōnore John Luxton, ko Bernice Mene, ko Tākuta Leonie Pihama, ko Hinurewa Poutu, ko Ahorangi Linda Tuhiwai Smith, ko Peter Tennent, ko Tākuta Ranginui Walker.

Ka taea te tirotiro ki ō rātou haurongo i konei: [link]

P. He pēhea te Ranga i whakawhanaunga atu ai ki te iwi whānui?

I tīmata te whakawhanaunga tuatahi a te Ranga ki te huhua o ngā whakahaere whakaruruhau i te marama o Hune/Pipiri 2012, ā, i haere tonu, taea noatia te marama o Oketopa/Whiringa-ā-nuku 2012.

Ko te whāinga o aua kōrerorerotanga tuatahi he whakapiki i te mārama, he takataka hoki i te whenua mō te whakawhanaunga ki te katoa.

I roto i ngā marama o Pēpuere/Hui-tanguru 2013 i haerea e te Ranga Kaupapa Ture ngā hui ā-hapori, me ngā rā motuhake, pēnei i ngā hui whare wānanga 120 neke atu.

Ko te ingoa o te kōkiri whakawhanaunga a te Ranga ko te Whakawhitinga Kōrero mō te Kaupapa Ture. I āta tautokona ki te huhua o ngā rauemi mōhiotanga mō ngā āhuatanga kaupapa ture matua. Ka taea e koe te haere ki konei ki te kimi kōrero mō te kaupapa ture: [link]

P. He aha ngā kōrero i roto i te pūrongo?

Kua tuhia ki te pūrongo te huhuatanga o ngā whakaaro o tētahi whakawhitinga kōrero ki te hunga o Aotearoa mō te Kaupapa Ture me ngā mahi e tika ināianei.

Ko te whakahau matua ia a te Ranga kia tautoko tonu te Kāwanatanga i te whakawhitinga kōrero mō te kaupapa ture, mā te whakawātea i ngā rauemi katoa e tika ana kia noho mōhio te iwi mō ngā whakaritenga o nāianei, me ngā kōwhiringa mō ngā rā e tū mai nei.

E kī ana te Ranga me haere he arotake o Te Ture Rārangi Tika Tangata o Aotearoa 1990.

E tohutohu ana te Ranga kia haere tonu te whakawhitinga kōrero mō te hono o te iwi Māori me te Karauna, nā reira i tēnei wā kāore e whakahau ana kia whakatūturutia te Tiriti o Waitangi, kia whakakorea rānei ngā tūru Māori i te Whare Pāremata.

P. He pēhea i whakatatūria ai e te Ranga ā rātou tohutohu?

I akiaki te Ranga i te hunga whai wāhi mai kia horaina mai ngā pūtake mō ō rātou whakaaro, hei āwhina i te kimihanga i ngā whakaaro o te nuinga, me ngā huarahi hei whai pea i roto i ngā mahi whai i muri. I kawea ngā whakaaro whakamutunga a te Ranga e te maha o ngā tāpaetanga e tautoko ana e whakahē ana rānei i tētahi whiringa. Engari kei runga ake i te whakaaro mō te maha i tautoko ko te āhua o ngā whiriwhiringa whakaaro o tētahi kaitāpae.

P. Me pēhea au e kimi whakaaro atu anō mō te kaupapa ture?

Mā te pae tukutuku a Te Ranga e pupuru ngā mōhiotanga a te Ranga me ngā rauemi whakaako. Ka taea te kite ētahi atu mōhiotanga me ngā rauemi whakaako mō te kaupapa ture o Aotearoa i raro i ‘Information Resources’. [link].

I tua atu i tērā kua whakairia atu ētahi rauemi mō ēnei hanga ki te pae tukutuku marautanga a Te Tāhuhu o Te Mātauranga: http://nzcurriculum.tki.org.nz/Principles/Future-focus/Tools/New-Zealand-s-Constitution.

Kei te pae tukutuku hoki tētahi atu rārangi rauemi mō ngā āhuatanga kaupapa ture.

P. E hia ngā moni i pau i tēnei mahi?

I pau tētahi $3.900 miriona hei whakatinana i te rautaki whakawhanaunga mai i Vote Justice me Vote Māori Affairs.

E matapaetia ana ka eke te katoa o ngā whakapaunga ki $2.6 miriona. $1.3 miriona kīhai i pau. Ko te take ko ngā pēhitanga o te wā poto, ko te whakatau hoki kia kaua e whakatūria he wānanga whakawhiti whakaaro, me te ngākau aroha o ngā rōpū hautū hui, i mahi rā mō te aroha, hei whakaheke katoa tēnei i te utu nui tonu.

P. He aha i pērā ai te nui o ngā moni i toe?

Nā runga i ngā here o te wā: he poto iho te wā whakawhanaunga i tā mātou i tūmanako ai. Nā te ngākau aroha o ngā rōpū hautū hui i mahi mō te aroha, me te whakatau hoki kia kaua e whakatūria he wānanga whakawhiti whakaaro, i iti iho ai te utu i tā mātou i tūmanako ai.

P. Kei hea ngā tono?

Ka pānuitia ngā tāpaetanga i āta tuhia i tēnei pae tukutuku i mua i te 14 Tīhema 2013.